20140716 【書展開鑼喇 !】《狂舞派》令顏卓靈迷失 出書寫信致死亡

顏卓靈首次出書，今朝一起身知要來，先至識緊張。(攝影：馬建華、仇志德)(蘋果日報)

係喇係喇，今日係書展開鑼第一日，成千人一早排隊等入場，熱鬧非常。有人真心想睇書，亦有唔少人想睇明星，好似處女出書嘅《狂舞派》顏卓靈咁，佢都有份出文字書，叫做《此致》，共18封信，包括致青春，致死亡，致地鐵遇到嘅陌生人，最後一封就係顏卓靈寫俾25歲嘅自己。

今日顏卓靈抱恙到書展舉行簽名會，佢話之前鼻水倒流，病咗一排，睇埋中醫，但一直未好。噚日再睇西醫，醫生話聲帶發炎:「今日把聲已經好啲，噚日得氣聲同走音。」

顏卓靈話首次出書，本來唔緊張，但今朝一起身知要來，先至識緊張。今次本書除咗有字，當然都有相，不過佢笑言自己包到實，冇嘢睇。顏卓靈又話自己好鍾意寫文字，有機會出書好開心，而且本書今日都係第一次拎到。至於本書用書信形式，佢就話:「拍完《狂舞派》之後好多嘢想講，公司鼓勵我寫長啲。18封信寫俾唔同嘅事同人，最感動一封係講夢想，舊年寫嘅。中間發生太多事，令自己迷失了。依家好似實現到夢想，但太多嘢發生得太快，故此迷失咗。睇番封信，見到當時自己為夢想去到盡，我覺得自己依家應該都係咁。」

受訪時顏卓靈講番自己迷失嘅感覺:「《狂舞派》成件事發生太快，自己接受不了。好多人對我哋有好大期望，但當時程我本住有得做就做嘅心態，冇乜信心，點知出來反差好大。跟住機會就一路迫住咁行，依家停低望轉頭先知自己經歷太多。」

顏卓靈又謂表示其中有封信係致死亡，年紀輕輕嘅佢已覺死亡近在咫尺:「以前一直覺得係電視情節，但近來覺得死亡越近，有中學同學自殺，去意大利電影節嗰陣機上有乘客突然離世，又有親人癌症復發，打擊好大。」 

顏卓靈又謂表示其中有封信係致死亡，年紀輕輕嘅佢已覺死亡近在咫尺。

顏卓靈講番自己迷失嘅感覺。