20140317 顏卓靈 那夜凌晨，我坐上了旺角開往大埔的紅Van

陳果執導嘅《那夜凌晨，我坐上了旺角開往大埔的紅Van》下月10日上映，終於推出官方海報，今次嘅海報同上次概念式嗰張好唔同，上次嘅海報就剩係得一架爛咗紅Van，加個戲名，其實同套戲好夾；而今次新出嘅海報，就有埋啲主角嘅樣，十一個角色企咗喺中間，下面就係個戲名。海報上方就寫住：「一夜之間，香港沒有了。」呢句說話，除咗適用於本片之外，好有可能都係陳果嘅政治隱喻——一夜之間，香港沒有了。早於1997年7月1日，那年煙花特別多(距離「去年」已經17年了)，一夜之間，香港沒有了。

今次喺海報入面，仲見到一個之前冇出過場嘅演員，就係憑住電影《狂舞派》人氣急升、獲提名今屆香港電影金像獎最佳女主角嘅顏卓靈，註明係「特別演出」，但係紅Van入面嘅乘客，喺預告入面都出晒鏡，都見唔到顏卓靈，佢就係做主角黃又南嘅女朋友阿怡。

早前有網民貼咗張圖，就喺一架紅Van出現喺非洲，有網民就謂，如果《那夜凌晨…》有下集，會唔會就係用呢一張海報呢？網民仲改埋個戲名，叫做《那夜凌晨，我坐上了非洲開往大埔的紅Van》。

睇完咁沉重嘅社會現實(一夜之間，香港沒有了)，再望番呢張非洲開往大埔的紅Van，竟然，笑唔出了。