20140411 顏卓靈自爆是「雙面伊人」

顏卓靈憑跳舞電影人氣急升。

【on.cc東網專訊】憑跳舞電影人氣急升的20歲女星顏卓靈（Cherry），近月先後榮獲台灣金馬獎及香港電影金像獎影后提名，前途無限，她拍過的廣告及電影，大部分都是青春活潑角色，現實中的Cherry則是「雙面伊人」，同時擁有熱情搞笑及冷淡低調的性格。 Cherry若遇到相熟友人會變得熱情如火，她自認是「低B無極限」：「我會同朋友冇啦啦喺街跳舞，好多廣告客戶都鍾意我發晒癲咁，會想我演繹好high嘅角色，好多人跳舞都要型，但我反而鍾意蠢蠢哋嘅感覺，鍾意亂咁扭身扭勢，我諗法係有啲同人唔同。」 平日傻更更的Cherry工作時即會變得謹言慎行，感覺比同齡的後生仔女成熟不少，她亦非無時無刻都能撻着「熱情mode」，有時會變得慢熱被動，難怪曾被誤會冷漠及「唔識做」，她說：「對住唔熟既人我只會點頭微笑，就算之前喺金馬獎，我都冇周圍集郵，冇自我介紹R撈，唔知人哋識唔識我丫嘛！但依家覺得應該試吓，下次見到鍾意嘅前輩好似劉青雲咁，會傻懵懵咁主動打聲招呼，呢個圈好細，應該向前輩取經多啲。（覺得被動性格蝕底？）始終呢個係我，可能有人欣賞我少說話多做事。」 如此性格極端，難怪Cherry自言適合演精神分裂角色：「我諗我演繹多重性格會幾在行，其實年輕女仔角色唔係太多，咩機會都會把握！希望有導演用我做啲成熟、外型好特別嘅角色，我相信化妝同演技可以解決到。」

顏卓靈自爆「雙面伊人」，同時擁有熱情搞笑及冷淡低調的性格。 顏卓靈 顏卓靈